MAHMOUD ALI YOUSSOUF/TWITTER

ሚኒስተር ጉዳያት ወጻኢ ኤርትራ ኣቶ ዑስማን ሳልሕ ምስ ሰበስልጣን ጂቡቲ ንምዝርራብ ሎሚ ጂቡቲ ድሕሪ ምእታዉ ክልቲአን ሃገራት ዝምድነአን ናብ ንቡር ክመለስሳ ተሰማሚዐን።

ብተመሳሳሊ ሚኒስትራት ጉዳያት ወጻኢ ኢትዮጵያን ሶማልያን'ውን ምስኡ ሓቢሮም ናብታ ሃገር ከም ዝተጓዕዙ ምፍላጥ ተኻኢሉ።

"ንኤርትራን ጂቡቲን ናይ ሰላምን ዕርቅን ጊዜ መጺኡ ኣሎ። ሎሚ ምስ ታሪኻዊ ምብጻሕ ሚኒስተር ጉዳያት ወጻኢ ኤርትራ ኣቶ ሳልሕ ዖስማን ኣብ ጂቡቲ ሓድሽ ምዕራፍ ተኸፊቱ'ሎ" ክብል ሚኒስተር ጉዳያት ወጻኢ ጂቡቲ ማሕሙድ ዓሊ ዮሱፍ ኣብ ትዊተር ጺሒፉ።

ወሃቢ ቃል ሚኒስትር ጉዳያት ወፃኢ ኢትዮጵያ፡ ናብ ጅቡቲ ዝተገብረ ዑደት ሰለስቲኦም ሚኒስትራት፡ ኣብ ዞባ ቐርኒ ኣፍሪቃ ሰላምን ድሕነትን ንምፍጣር ኣካል ናይቲ ኣብ ኣስመራ ዝተበፅሐ ስምምዕ ከምዝኾነ ንቢቢሲ ትግርኛ ኣረዲኡ።

"ኣብ መንጎ ኤርትራን ጅቡቲን ዝፀንሐ ናይ ዶብ ምስሓሓብ ፀገም ኣሎ። እዚ ንምፍታሕ ኢትዮጵያ ቅድም ኢላ ዝጀመረቶ ፃዕሪ ኣሎ። ናይዚ ጻዕሪ ኣካል ገይርካ ምርኣይ ዝከኣል እዩ" ኢሉ።

ክልቲአን ሃገራት ኣብ መንጎአን ዘሎ ዶባዊ ምስሕሓብ ኣብ 2008 ናብ ጎንጺ ድሕሪ ምምርሑ፡ ዝምድናአን ሓርፊፉ'ዩ ጸኒሑ።

• ጂቡቲ ኣብ ልዕሊ ኤርትራ ዝተነበረ ማዕቐብ ንኽለዓል ዝቐረበ ሕቶ ተቓዊማ
• ጂቡቲ፡ ውድብ ሕቡራት ሃገራት ምስ ኤርትራ ክዓርቃ ትሓትት
• ''ቀርኒ ኣፍሪቃ ሓንቲ ካብተን ቀራናት ዞባ እያ እየ ዝብላ''

ነቲ ኩነታት ንምህዳእ፡ ሃገረ ቐጠር ወታሃደራታ ኣብ ዶባት ክልቲአን ሃገራት ብምስፋር፡ ተጻቦኦታት ደው ኣብ ምባል ኣበርኪታ'ያ።

እንተኸነ ግን፡ እቲ ንቐጠር ንምንጻል ብሃገራት ወሸመጥ ዝተኻየደ መናውራታት፡ ምስ ኤርትራ ዝነበራ ዝምድና ስለዝተንከፎ፡ ወታሃደራታ ክትስሕብ ከም ዝተገደደት ተዓዘብቲ ይገልጹ።

MAHMOUD ALI YOUSSOUF/TWITTER

ዶባዊ ምስሕሓብ ክልቲአን ሃገራት ኣብ ዙርያ እምባ ዱሜራን ደሴት ዱሜራን ምዃኑ ይንገር።

ጂቡቲ፡ ኣብቲ ዶባዊ ግጭት ብኤርትራ ተማሪኾም ዝበለቶም ወታሃደራታ ክምለሱላ ክትሓትት ምጽንሓ ይፍለጥ።

ብሰንኪ'ዘኢ ኣብ ልዕሊ ኤርትራ ማዕቀብ ክግበር ካብ ዝጎስጓሳ ሃገራት ኣፍሪቃ ምንባራን፡ ክሳብ ቀረባ እዋን እቲ ማዕቀብ ከይለዓል ክትጠልብ ጺኒሓ'ያ።

ኣብ ሓምለ 9 ኣብ መንጎ ኢትዮጵያን ኤርትራን ስምምዕ ሰላም ድሕሪ ምኽታሙ፡ ዝምድና ኣብቲ ዞባ ዘለዋ ሃራት ክመሓየሽ ይረአ ኣሎ።